Облыс әкімі Ғали Есқалиевтің төрағалығымен жер телімдері мәселелері бойынша кеңес өтті.

Жобаларды іске асыру үшін инвесторларға жер беру туралы «Аqjaiyq» ӘКК» АҚ Басқарма төрағасы Надир Курумбаев айтып берді:
- «Aqjaiyq» ӘКК арнайы тетігі арқылы инвестор жер учаскесін аукционға және конкурсқа қатыспай-ақ ала алады, оны әлеуметтік, коммерциялық, өнеркәсіптік және өндірістік, ауыл шаруашылығы объектілеріне жалға беру аяқталғанға дейін немесе аяқталғаннан кейін кадастрлық құны бойынша сатып ала алады.Қолданыстағы тетіктің арқасында 25-тен астам инвестор жер телімдерін алды, онда 2000 жұмыс орнын құра отырып, 82 млрд теңге сомасына 28 инвестициялық жоба іске асырылады. «Ақжайық» тұрғын ауданының құрылысы үшін жер учаскелері де осы тетік шеңберінде беріледі. Бүгінгі таңда БҚО және басқа облыстардан 9 құрылыс компаниясынан өтінімдер келіп түсті. 2 жергілікті компаниямен шарттар жасалды: «Каз-Хол» ЖШС және «Болашақ-Т» ЖШС.

Кәсіпкерлерге шағын учаскелерді ұсыну үшін «Көше саудасына арналған 100 орын» бағдарламасы жұмыс істейді. Жер учаскелері gosreestr.kz порталында электрондық сауда-саттық өткізу арқылы бөлінеді, бұл адам факторының араласуын болдырмайды және өткізілген сауда-саттықтың ашықтығын қамтамасыз етеді.

– Бүгінгі таңда 5 онлайн аукцион өткізіліп, 43 жер учаскесі сатылды. Жоба аясында 12 кәсіпорын мен 70 жұмыс орны құрылды. 2021 жылы осы бағдарлама бойынша 50 жер телімін іске асыру, 10 жаңа кәсіпорын және 100 жаңа жұмыс орнын құру жоспарлануда, – деп атап өтті Надир Құрымбаев.

Әлеуметтік-экономикалық даму, өңірдің инвестициялық әлеуеті, инвестициялық қызметті мемлекеттік қолдаудың қолданыстағы нысандары туралы барлық ақпаратты инвесторлар http://invest07.gov.kz порталынан, сондай-ақ, «Aqjaiyq» ӘКК инвесторларға қызмет көрсету орталығынан ала алады, ол бүгінгі таңда 600 млрд теңгеден астам сомаға 60-тан астам инвестициялық жобаларды сүйемелдейді.